Un spetacul che al puarte te Ete di Mieç in Friûl

Un spetacul di peraulis, di musiche e liendis, dutis scritis e cjantadis par furlan, che al puarte il public dentri dal secul decim tierç jenfri cavalîrs, pelegrins, bataiis, sperancis, amôrs e vuarisons. “Nine. Doi miluçs, un mot, une promesse” al è un viaç te memorie e dentri de anime, une conte evocative che e incrose la storie cu la liende, la realtât cu la fantasie. Scrit dal autôr e cjantant Alessandro Pozzetto, cun Nico Odorico al piano, eletroniche e composizion musicâl e cul storic Paolo Paron ae vôs, il spetacul al tire dentri cu la storie di un zovin vuerîr de Estonie, Kalju, che tal 1227 al rive tal Hospitale di S. Tomâs di Maian, un lûc cuntun passât ben grant, fondât tal secul decim secont dai Cavalîrs di S. Zuan di Jerusalem. Chi il vuerîr che al ven di lontan al cjate Nine, une zovine contadine e vuaridore dal lûc, cuntun savê antîc, che e sfide lis convenzions di chê epoche. Il spetacul al è inmaneât in ocasion de Fieste de Patrie dal Friûl, cu la poie de ARLeF e de Regjon Friûl-Vignesie Julie. Ogni serade e je a jentrade sore nuie e cence bisugn di notâsi: daspò de prime a Martignà, si va indevant vinars ai 4 tal Auditorium di Rivignan, ai 5 te sale dal Consei di Sedean, ai 6 a Cividât (li de scuele “Piccoli”) e a Tumieç tal albierc “Roma”. (A.I.) – 03.04.2025