Un tercet nassût tal “Bon” al sune Parîs di 100 agns indaûr

“Armonie in città” (Armoniis in citât) al va indevant cul propri percors musicâl a Udin, martars ai 3 di Setembar inte Glesie di Sant Antoni di Padue ai Riçs. Protagonistis de serade, trê musicistis che si son cjatadis par frecuentâ i cors di perfezionament di musiche di cjamare de Fondazion “Luigi Bon” tignûts di Federica Repini. Un incuintri pas câs, chel des trê artistis che a vegnin dal Friûl, dal Venit e de Slovenie, che al à inviât une colaborazion cetant penze e di alt nivel. Les Coquelicots Trio – formât di Sara Della Mora, Katja Panger e Marina Miani – al proponarà un conciert che al è une “cjaminade intal zardin de anime”. Ven a stâi, un viaç inte citât di Parîs tal principi dal ‘900: la citât dai 100 teatris e dai prins cines, dulà che une sdrume di artiscj e inteletuâi a lavoravin ae costruzion di chê che vuê o clamìn modernitât. (A.I.) – 02.09.2024