Une aventure ator pe Italie dai agns Cincuante

Al rive intal Circuit dal Ert “Fino alle stelle” (Fint aes stelis), un spetacul che al messede musiche e conte intune aventure traviers la Italie dai agns Cincuante. Diret di Raffaele Latagliata, scrit e interpretât di Agnese Fallongo e Tiziano Caputo, e je une esplorazion ator cui che al olse cori daûr dai siums, ancje cuant che lis circostancis a somein contrariis. La tournée e cjaparà inviament joibe ai 13 dal Auditorium di S. Vît dal Tiliment, po dopo si movarà vinars ai 14 tal Auditorium Biagio Marin di Grau e sabide ai 15 tal Teatri di Polcenic. La storie e va daûr des vicendis di un contestoriis sicilian e di une fantate che no sa ancjemò ce talent straordenari che e à. Insiemi i doi a fasin un viaç ae ricercje di innomine e fortune dilunc di dute la penisule, traviers regjons, dialets e liendis, ma ancje dentri di lôr. (A.I.) – 11.02.2025