Une comedie caotiche tant che il nestri timp

Natalino Balasso e Michele Di Mauro a son i protagoniscj dal spetacul “La grande magia” (La grande magjie) di Eduardo De Filippo, une comedie ‘nere’ sospindude jenfri realtât e finzion, in sene tal Teatri gnûf “Giovanni da Udine” di martars ai 28 a joibe ai 30 pe regjie di Gabriele Russo. Scrite di Eduardo intal 1948, e je une di chês che ur disin “comediis dai dîs dispar” dulà che il dramaturc e regjist partenopeu al fronte lis cuistions problematichis dal vivi cuotidian e des relazions complessis tra i oms. Fra ducj i tescj di Eduardo, daûr dal regjist, chest al è une vore complès, ma al è “necessari vuê pai temis che al fronte, pes relazions che al propon. Parcè che e je une comedie disecuilibrade, mancul lineâr e ‘matematiche’ di chês altris, sospindude e caotiche tant che il timp là che o vivìn”. (A.I.) – 27.01.2025