Une ex stele dal cine porno a Gurize

La seste edizion dal festival “AlienAzioni” e tache joibe ai 26 aes 8.45 sot sere li dal Kinemax di Gurize cuntun incuintri particolâr: chel cun Luce Caponegro, che par cualchi an e je stade la stele plui famose di Italie intal cine pornografic cul non di Selen. Di chê volte, dut câs, a son passâts tancj agns e Luce e à lassât aromai chel mont “improibît ai minôrs”, ancje se in tancj a continuin a visâsi dai siei cines. L’incuintri “La gnove vite di une ex pornostar” al vûl duncje lâ dentri intal so percors di vite, intes sôs sieltis, intai siei cambiaments, cence trascurâ i esordis de atore, in dialic cun Patrizia Artico. Pe ocasion, a vignaran lets di Marilisa Trevisan ancje cierts tocs su lavôr, seduzion, maternitât e su la capacitât di savê trasformâsi, scrits di Luce Caponegro propit pal incuintri. (A.I.) – 25.10.2023