Une serade jazz pe etât dal aur de Italie

Al sarà un dai saxofoniscj talians plui aclamâts, Stefano Di Battista, un non di ponte dal jazz european e mondiâl, il protagonist in cuintet dal penultin apontament de vincjesime edizion de rassegne “Il volo dal Jazz” inmaneade dal circul Controtempo. Sabide ai 30 tal Teatri “Zancanaro” di Sacîl, il jazzist al larà sù sul palc par presentâ il progjet musicâl “La Dolce Vita”, un tribût ae etât dal aur de culture taliane. Il titul nol è dome che un riclam al innomenât cine di Federico Fellini, ma al rapresente ancje un viaç inte bielece, intai siums e inte vitalitât di un timp che al continue a jessi une ispirazion. (A.I.) – 29.11.2024