Une ‘stele’ dal violin a Pordenon cuntun Stradivari

Cuntun program dedicât dal dut ae musiche di Wolfgang Amadeus Mozart, si cjatin martars ai 18, in esclusive assolude sul palc dal Teatri Verdi di Pordenon, la grande violiniste Janine Jansen e la Camerata Salzburg. Stimade dal New York Times “tra i soliscj plui famôs tal mont, une scoltadore apassionade, profonde, perfete pe musiche di cjamare”, Janine Jansen e je une stele di vuê tra chês plui preseadis de sene internazionâl. A Pordenon, dulà che e vierç il zîr esclusîf cu la orchestre specializade intal repertori dal gjeni austriac, e sunarà un violin Stradivari dal 1715 “Shumsky-Rode”, imprestât di un benefatôr european. (A.I.) – 17.04.2023