Al è ancjemò emozionant il ricuart dal conciert che ai 17 di Fevrâr al è stât presentât di Euritmica tal teatri “Rossetti” di Triest pal progjet “Puint a Nordest”, dentri dal program uficiâl di GO!2025. Une serade che e à viodût ospite la Bollani All Stars, une band concepide di pueste dal grant pianist talian, che al à volût al so flanc i zigants dal jazz dal dì di vuê par un spetacul che al restarà inte storie dal jazz talian. Stefano Bollani cumò al torne a Udin, simpri in graciis di Euritmica, pe rassegne “Note Nuove”, cuntun conciert che al jentre intal progjet “Jazz Sessions” che al cjape dentri centenârs di students des mediis superiôrs. Bollani al presentarà vinars ai 28 tal Teatri gnûf “Giovanni da Udine” il so “Piano Solo Tour”, che lu viôt impegnât intai teatris principâi di Italie, di bessôl e cence nuie di programât, parcè che al è un spetacul che al torne a nassi ogni sere diferent. (A.I.) – 27.02.2025
Foto di A. Primavera
