Ve il cjantautôr cjargnel che al plâs a Iggy Pop

Lis sôs cjançons a àn fat il zîr dal mont partint de Cjargne e racueìnt fintremai il preseament di une rockstar internazionâl dal nivel di Iggy Pop, che dilunc di une pontade dal so program radio de BBC al à mandât in onde il toc “Nijò” di Massimo Silverio. il cjantautôr di Çurçuvint al sarà sabide ai 27 dongje di cjase, inte Sale polifunzionâl di Soclêf, par presentâ il so gnûf album “Hrudja”. Nassût dal incuintri cul produtôr Manuele Volpe e cul jutori dal musicist piemontês Nicholas Remondino, al è un lavôr di contrascj, di cidins plens di sun di là dai confins di un gjenar musicâl, dulà che l’incjant de tiere di confin e la tradizion di une lenghe antighe a formin un lengaç personâl. (A.I.) – 26.01.2024