Veronica Pivetti par ridi des discriminazions

“Cemût sono lis robis rivuart ai ses? Un vecjo proverbi nus sugjerìs: cjavei luncs, cerviel curt”. Al scomençave cussì Paul Julius Moebius, assistent de sezion di neurologjie di Lipsia, intal so tratât dal 1900 “La inferioritât mentâl de femine”. Giovanna Gra e à cjapât in man chest test, intune cun altris, e lu à passât pe interpretazion ae atore Veronica Pivetti, compagnade sul palc di Anselmo Luisi. La produzion e je dai Artisti Associati di Gurize, la regjie e je firmade di Giovanna Gra e Walter Mramor. Il spetacul al sarà ospit di cinc teatris dal circuit dal ERT in regjon, di miercus ai 26 a S. Denêl fin a domenie ai 30 a Mugle, passant par Lignan, Grau e Tumieç. Il spetacul al met in sene tescj che in pôcs a cognossin, scrits intal 1900, che a discriminin, a son paradossâi e, lôr dispiet, a fasin murî dal ridi. (A.I.) – 25.03.2025