A Cjampfuarmit la palestre intal non di Talotti

Il campion mai dismenteât di salt in alt Alessandro Talotti al sarà memoreât a Cjampfuarmit cu la cerimonie di intitulazion de palestre. L’apontament vinars ai 5 di Avrîl aes 6.30 sore sere inte Palestre comunâl “Alessandro Talotti” in vie Mariuzza, dentri dal pôl scolastic sportîf de capitâl. Cuntune delibare di zonte dai 18 di Otubar dal 2022, la aministrazion comunâl e à intitulât la palestre al campion muart prin de ore ai 16 di Mai dal 2021, a dome 40 agns. “Lu ricuardarìn – al sclarìs la sindiche Erika Furlani – scuvierzint la targhe in sô memorie in presince dai familiârs, dai amîs e cul coinvolziment ancje dal volontariât. Alessandro Talotti, simpri tant leât ae sô tiere, al è stât e al reste un esempli par ducj i zovins de nestre comunitât”. (A.I.) – 03.04.2024