A Tumieç la prime tape dal campionât di trial

Prime tape stagjonâl dal campionât talian di trial, domenie ai 2 di Avrîl a Tumieç. Spetacul e adrenaline, cun salts di precision al milimetri, a saran sigurâts dai miôr specialiscj des dôs ruedis cu lis sgrifis in Italie. I passe cent pilotis in gare si sfidaran tra i ostacui naturâi impegnatîfs des dodis zonis di gare, di frontâ par dôs voltis e dutis dongje dal centri abitât, acessibii cun facilitât dal public e dai esperts dal setôr. “Riul confin” dongje de ex polvariere di Pissebus, “Puint dal Mierli” su la strade par Dieç e “Pracastello”, a saran lis areis dedicadis ae gare, intant che il grant parc di vie Marchi al ospitarà la zone di partence e lis premiazions. (A.I.) – 28.03.2023