Campionât tacât: pate pal Udin

E je ancjemò un cantîr viert, ma e je rivade a tornâ a cjase almancul cuntun pont te prime zornade dal campionât di serie A. La gnove Udin dal alenadôr Kosta Runjaic e à fat fadie, ma ae fin e je rivade a impatâ 1-1 la partide cul Bologne (rigôr di Orsolini, gol furlan dal argjentin Giannetti), une scuadre che l’an passât e je rivade tierce e che e zuiarà la Cope dai campions, ancje se e à cambiât l’alenadôr e pierdût un pâr di campions. L’Udin – cuntune maiute dute zale, compagne di chê di 30 agns indaûr – nol somee che al vedi cambiât masse a pet de scuadre che si è salvade fasint fature intai ultins minûts dal ultin campionât. Il gnûf alenadôr “jugo-todesc” al veve però visât che par viodi un gnûf zûc, chel che al vûl lui, bisugne spietâ almancul 3-4 zornadis. Cun di plui, ae scuadre al mancjave ancjemò Alexis Sanchez, l’ultin rivât in Friûl, e ancje Samardzic, che dopo un an di tire e mole (al veve di lâ al Inter, po dopo al Napoli, anzit no al Milan…) al à sielt l’Atalanta, firmant propit il dì de prime partide. Sabide ai 24 a Udin, prime volte in cjase par chest an cuintri la Lazio. (A.I.) – 19.08.2024