159
Cuarante agns indaûr, ai 11 di Lui dal 1982, la nazionâl taliane di balon e vinceve il tierç Mondiâl, dopo chei dal 1934 e dal 1938. Une imprese che ancjemò vuê, par tancj, e sta sore di chês precedents, ma ancje de vitorie dal 2006. Par nô, la vitorie de Italie a “Spagna 82” e je ancjemò plui impuartante, stant che il comissari tecnic, Enzo Bearzot, al jere di Dael, e che tant il portîr che il cjapitani Dino Zoff al è di Marian. Inte scuadre che 40 agns indaûr e vincè 3-1 la finâl cu la Gjermanie, devant dal entusiasim dal president de Republiche, Sandro Pertini, e di milions di spetatôrs, a jerin ancje Franco Causio, che al zuiave cun l’Udin, e un altri furlan, Fulvio Collovati di Teôr. (A.I.) – 11.07.2022
