Dal capanon di Pradaman a lis machinis di corse

Une ecelence dute furlane, Giacomo Orioli, vincjenûf agns, al puarte a cjase un acuardi di lustri. Tornât de impuartante “24 ore” di Daytona, la prime gare endurance di nivel mondiâl dal 2023, Orioli al è stât contatât di Iron Lynx, prestigjôs laboratori motoristic talian, par controlâ e comedâ sul cjamp lis machinis di corse de Lamborghini. La passion pai motôrs di Orioli e tache cuant che al jere tant zovin: dopo agns di gavete al à viert a 24 agns il prin “capanon” a Pradaman, po dopo une vere oficine furnide a Manzan, la “Orioli Carbon Fiber Repair & Production”, doprant apont la fibre di carboni. Une tecniche che lu à puartât sui cjamps di gare plui impuartants, ancje par fâ lis provis di vuide su lis machinis di corse. (A.I.) – 07.03.2023