E vie lui… Mandi Cioffi, al rive Cannavaro par no lâ jù in B

Gnûf alenadôr pal Udin, che daspò de ultime partide pierdude tai ultins minûts, sabide di sere a Verone, al à decidût di parâ vie Gabriele Cioffi, che al jere tornât par cjapâ il puest di Sottil. Al so puest, dopo vê cirût, daûr di chel che a disin i esperts, Semplici, Stramaccioni e Reja, al rive Fabio Cannavaro. L’ex campion dal Mont e cjapitani de Nazionâl taliane tal 2006, che al à alenât in Cine, in Arabie e par pocjis zornadis in serie B, a Benevento, al sarà judât dal fradi Paolo e di Giampiero Pinzi, une bandiere dal Udin, che al jere stât il vice di Cioffi un pâr di agns indaûr. Cannavaro – il decim cuint alenadôr dai ultins dîs agns – al à cinc partidis e un fruçon di chê cu la Rome, che si zuie joibe ai 25, par cirî di no fâ tornâ l’Udin in B daspò di trente agns. Al covente un mieç miracul, viodûts i erôrs de scuadre tes ultimis setemanis. O forsit i Pozzo a sperin che ai zuiadôrs ur bastedi dome une ‘scjassade’ par no finî mâl. A Udin no je la prime volte che la societât si svee un tic tart: al jere sucedût tal 2019, cun trê alenadôrs cambiâts, e ancje l’an prime (il tierç, Tudor, al rivà a salvâ la scuadre propit te ultime zornade). (A.I.) – 22.04.2024