EYOF, il Friûl al salude une edizion di record dai zûcs olimpics invernâi

Ae Fiere di Torean di Martignà, ae ICE Arena prontade tal Paveon 6 pal torneu di hockey, si è sierade domenie la 16e edizion invernâl di EYOF, il festival olimpic de zoventût europeane. Ducj i atletis e lis delegazions dai 47 comitâts olimpics nazionâi de Europe si son cjatâts pe fieste finâl, sfilant dopo i salûts dal president dai Comitâts olimpics europeans, il grêc Spyros Capralos. Intal passaç de bandiere olimpiche europeane dal Friûl-Vignesie Julie a Borjomi e Bakuriani in Gjeorgjie, la nazion che intal 2025 e ospitarà la prossime edizion invernâl, il president Massimiliano Fedriga si è dit onorât di vê ospitât cheste grande cunvigne sportive: un sucès ancje su gjornâi, Tv, rêt… E un sucès cuasi di record ancje tes garis, viodût che la Italie e je rivade seconde cun 21 medaiis: 6 di aur, 8 di arint e 7 di bronç. (A.I.) – 30.01.2023