Fantini: prime Lignan, po dopo i Mondiâi

Medaie di aur aes Olimpiadis di Tokyo 2020 intai 100 metris stîl libar, Antonio Fantini al è il ‘premi speciâl’ dal Hemingway 2023, clamât ‘Lignano, 120 anni di futuro’. L’atlete paralimpic al è stât sielt par vê savût frontâ i sacrificis leâts a une malformazion tant rare e ae sô disabilitât, trasformantle intal sium dai travuarts sportîfs plui prestigjôs, ma ancje par savê comunicâ cui zovins e ispirâju. Fantini si contarà vinars ai 23 aes 9 di sere su la Terrazza a Mare di Lignan e al cjaparà il Premio Hemingway sabide ai 24. “O soi cetant braurôs e emozionât, cun di plui al flanc di vincidôrs cussì prestigjôs – al à declarât Fantini –. O calcoli Lignan la mê seconde cjase di cuant che o ai scomençât a nadâ chi, e chest al è di simpri il puest là che o prepari i miei obietîfs, di dulà che o soi ripartît intai periodis di riabilitazion, dulà che cumò o prepari i travuarts a vignî. Il prossim a Manchester dai 31 di Lui, pai Mondiâi Paralimpics”. (A.I.) – 22.06.2023