Gentile scualificât, al salte il derby di Udin cun Cividât

La Apu Old Wild West di Udin e frontarà lis ultimis trê zornadis de prime fase dal campionât e, soredut, il derby cuintri Cividât di domenie di sere al ‘Carnera’, decisîf pe seconde fase, cence un dai zuiadôrs plui fuarts. Alessandro Gentile al è stât scualificât par trê zornadis dal judiç sportîf de A2 di bale tal zei par chel che al è sucedût daspò de partide di domenie passade cuintri Chieti, pierdude de scuadre di Udin par 70 a 69. Dopo i ultins pont dai aversaris, Gentile al jere lât cuintri l’american Darryl Jackson, sburtantlu a tiere, e par dôs voltis al jere stât stratignût dai compagns di scuadre. Il judiç sportîf al à multât Chieti parcè che a jerin personis no autorizadis in cjamp e al à scualificât i doi zuiadôrs cun dôs zornadis pe barufe, cuntune in plui a Gentile par vê corût daûr ai arbitris. (A.I.) – 28.02.2023