Gjinastiche ritmiche, un risultât strabon pe scuadre di Udin

La scuadre di gjinastiche ritmiche de Associazione Sportiva Udinese e à vuadagnât un secont puest spetacolâr al Palasport di Cuneo, dulà che si è fate la prime prove dal campionât massim di serie A. A lâ jù in pedane a son stadis Tara Dragaš, Elena Perissinotto, Isabelle Tavano e il prestit forest, la todescje Anastasia Simakova. Cumò la scuadre e continue il lavôr in palestre in spiete de seconde prove, in program a Ancone ai 4 e ai 5 di Març. Simpri la fin de setemane passade si è fate ancje la prime prove di serie C di gjinastiche artistiche feminine. Lis fantatis de scuadre blancje e nere a àn fat cualchi erôr, ma ancje tancj biei esercizis, sierant al otâf puest. (A.I.) – 20.02.2023