I atletis gjamaicans in ‘gare’ cui fantats di Lignan

“Vola alto con lo sport” (Svole alt cul sport) al è il titul dal incuintri che joibe ai 5, des 9.30 di buinore tal stadi “Teghil” di Lignan, al viodarà protagoniscj i atletis de Nazionâl gjamaicane di atletiche lizere, dal 2006 di cjase in Friûl e di pôc tornâts dai Zûcs Olimpics di Parîs. Cun lôr, atletis zovins e students furlans de Lupignanum Track & Field di Lignan e des realtâts sportivis principâls de regjon, dongje dai fantats e des fantatis dal Bella Italia Village. Lis stelis caraibichis, vuidadis dal grant Kishane Thompson, medaie di arint ae Olimpiade 2024, campion gjamaican e cuntun primât personâl di 9″77 sui 100 metris, a parteciparan aes garis di stafete organizadis de Nuova Atletica dal Friuli par fâ une grande fieste che e permetarà ai zovins furlans di lâ jù in piste e condividi il moment cun atletis di nivel straordenari. (A.I.) – 04.09.2024