La piste Çoncolan 1 e continue a ospitâ i grancj campions dal schi alpin: dopo il talian Filippo Della Vite e l’atlete di ponte de scuadre slovene, Žan Kranjec, vuê e je stade la volte des atletis talianis, tra chês Marta Bassino e Federica Brignone. In chescj dîs, di fat, lis gigantistis a son impegnadis intune serie di sessions di alenament in viste dal prossim fin de setemane che la Cope dal Mont e fasarà tape a Kranjska Gora in Slovenie.
Suntun percors preparât dai tecnics de nazionâl taliane e dal grup di PromoTurismoFVG, Marta Bassino, Federica Brignone, Asia Zenere, Roberta Melesi, Laura Pirovano, Elisa Platino e Laura Steinmair a àn fat une preparazion intense.
La piemontese Bassino, prime de classifiche di Cope dal Mont di zigant e à dimostrât di jessi in grande forme e pronte pes garis slovenis: su la Podkoren di Kranjska Gora e à dominât doi agns indaûr cuntune dople vitorie, lant sù di gnûf sul podi ancje inte stagjon passade, concuistant il tierç puest. Pe Brignone, vincidore de Cope dal Mont assolude intal 2020 lis garis in Slovenie a podaressin rapresentâ il svolt de stagjon cu la concuiste di un podi o une vitorie.
Di là des atletis talianes, in chescj dîs, a àn programât une serie di alenaments sul Çoncolan ancje ciertis atletis slovenis, bulgaris e polachis. A puartâ i salûts aes scuadris al è stât il responsabil dal pôl di Ravasclêt-Çoncolan, Osvaldo Tavosanis. (A.D.G.) – 4.01.2023
