Impegns internazionâi pal pre-campionât dal Udin

Scuadris impuartantis e internazionâls pes primis partidis amichevulis dal Istât dal Udin. La scuadre alenade di Sottil e tacarà ai 13 di Lui al Dolomiten Stadion di Lienz cuintri il Rapid Lienz (cuarte serie austriache) alenât dal pari dal gnûf acuist blanc e neri Sandi Lovric. Simpri dilunc dal ritîr a Lienz, l’Udin si scuintrarà ancje cun la Union Berlin, la sorprese dai ultins agns in Bundesliga, chest an in Europe League, daspò il Schalke 04 e soredut il Bayer Leverkusen: une partide che e ripuartarà la memorie indaûr intune des gnots europeanis plui gloriosis de storie blancje e nere, chê dai 9 di Dicembar dal 1999. Lis ultimis partidis amichevulis prime dal campionât a saran cuintri la nazionâl dal Qatar, che e zuiarà in cjase il Mondiâl, e cuintri il Paphos Fc, scuadre de massime serie cipriote.(A.I.) – 28.06.2022