Dopo Manuela Di Centa e Gabriella Paruzzi, ve une altre campionesse furlane te Cope dal Mont di schi. E je la biatlete sapadine Lisa Vittozzi, ancje jê cressude tant che chês altris intai club de Federazion regjonâl, che domenie ai 17 e à concuistât il titul a Canmore, in Canadà, ae fin di une stagjon straordenarie. Il risultât memorabil al è stât otignût cuntune stagjon di record, massime inte seconde part, di Zenâr incà, dopo vê passât cierts problemis fisics. Il finâl al è stât une marcje trionfâl, des medaiis a Nove Mesto ai sucès a ripetizion, fint al sigjîl finâl. Il belanç finâl al conte cinc vitoriis, trê seconts puescj e doi tierçs e la concuiste ancje di dôs copis di specialitât, intal individuâl e intal inseguiment. Cun chest sucès, Lisa e je la seconde taliane di simpri a otignî il globi di cristal, dopo il dopli firmât di Dorothea Wierer intal 2018-2020. (A.I.) – 18.03.2024
173
