La flame des olimpiadis “speciâls” e rive a Udin

La citât di Udin e je pronte pal passaç, martars ai 25 di Fevrâr, de flame di “Special Olympics” pe tape de “Special Olympics COMMUNITY RUN”. Aes 11 di buinore, in contemporanie cun chês altris regjons talianis, atletis cun e cence disabilitâts inteletivis a rivaran in Place Libertât di vie Vittorio Veneto, dopo vê fat insiemi une corse simboliche di svicinament ai Zûcs mondiâi invernâi “Special Olympics” – un moviment mondiâl che al inmanee e al promôf sport par atletis cun e cence disabilitât inteletive -, che si fasaran, pe prime volte in Italie, a Turin dai 8 ai 15 di Març. Par celebrâ chest avigniment sportîf, che al previôt il coinvolziment di 1.500 atletis e di 102 delegazions di dut il mont, il protocol internazionâl al previôt il passaç de torce in ducj lis capitâls di regjon. A Udin, a vuidâ il grup di atletis e sarà Caterina Plet, schiadore di Dael che, daspò di un lunc periodi di stop par vie di un signestri al zenoli, e je tornade di pôc in gare, partecipant ai Special Olympics Italia e concuistant dôs medaiis impuartantis. Caterina Plet e je stade clamade inte scuadre nazionâl che e parteciparà ai Zûcs mondiâi invernâi di Turin. In bande di jê, a saran il testemoniâl di ecezion Michele Antonutti de APU di Udin, la societât di bale tal zei, i atletis “Special Olympics” e une cincuantine di students dal Istitût “Volta” di Udin. (A.I.) – 24.02.2025