La imprese dal Udin e vuaste la fieste dal Milan

A son passâts sîs mês par viodi l’Udin tornâ a vinci in cjase, al stadi Friuli/Dacia Arena. Ai 18 di Setembar al fo 3-1 cuintri l’Inter, sabide di sere ai 18 di Març il stes risultât cul Milan e pecjât, a chest pont, che no sedin altris scuadris di Milan in A! Batudis a part, e je stade une serade perfete, no dome pal risultât, ma par cemût che al è rivât: cuntune grande prestazion di scuadre, cu lis justis intuizions dal alenadôr Sottil, che al à sielt un centricjamp di cualitât, cuntune difese cuasi perfete cuant che e je chê titulâr. Ruvinâ la fieste di Ibrahimovic, deventât a Udin il cjapitani e il marcjadôr plui vecjo de storie de serie A – e ancje chê dai tancj tifôs dal Milan vignûts di fûr – e jê une sodisfazion. Ancjemò miôr l’otâf puest. I 38 ponts e lis peraulis dal alenadôr (“cumò sì che o tachìn a cjalâ la classifiche”), che a fasin sperâ intun grant finâl di stagjon. (A.I.) – 20.03.2023