L’Udinese calcio e à anunziât lis nominis di chel che une volte al jere il ‘diretôr tecnic’ e che cumò al è stât dopleât: un Responsabil de Aree Tecniche e un “Group Technical Director”, che al vûl dî in sostance “diretôr tecnic di dut il grup”, ven a stâi ancje dal Watford. Di fat, la figure sielte e je chê di Gianluca Nani, za consulent di Gino Pozzo in Ingletiere, cun plui di 30 agns di esperience intal mont dal balon talian e internazionâl. Cun lui il gnûf responsabil de aree Tecniche che al cjape il puest di Balzaretti, durât mancul di un an: Gökhan Inler, za centricjampist tal Udin dal 2007 al 2011, une figure di esperience dal balon che al cognòs ben il Friûl. Forsit al varà di judâ ancje il gnûf alenadôr che, ancje se nol è ancjemò uficiâl, cuasi dal sigûr al sarà Kosta Runjaic, un todesc di origjins cravuatis, nassût a Viene intal 1971, che intai ultins agns al à lavorât in Polonie. (A.I.) – 13.06.2024
Lis novitâts dal Udin: doi diretôrs
59