Lisa Vittozzi e vinç pe seconde volte te stagjon

Cuint sucès in Cope dal mont di biathlon par Lisa Vittozzi, che domenie e à vinçût la gare a inseguiment di Ruhpolding, in Gjermanie. Protagoniste di une des sôs provis plui spetacolârs in dute la cariere, dopo il tierç puest intal sprint di vinars, la sapadine no si è lassade butâ jù dal prin erôr al poligon e di li nol à falât plui nuie. Svelte sui schîs e precise al tîr, e je restade simpri intal grup di cjâf. Chest al è il secont sucès stagjonâl, dopo la vitorie inte “15km” di Östersund che e à screât l’Invier e al è il cuint in cariere pe atlete, che dal 2019 no cjatave la vitorie intune gare “pursuit”. In graciis dal sucès, cumò e je al tierç puest de classifiche gjenerâl di Cope dal Mont a 606 ponts, daûr de Tandrevold e de Braisaz. (A.I.) – 15.01.2024