L’Udin si scjalde pe riprese dal campionât

Inte setemane de fin dai Mondiâi di balon in Qatar, l’Udin al scomence il cont al ledrôs pe riprese dal campionât, il 4 di Zenâr aes 9 di sere tal Stadio Friuli/Dacia Arena cuintri l’Empoli. Il calendari des partidis amichevulis al è partît cuntune disfate cuintri une scuadre dal massim campionât inglês, il West Ham, sabide passade, ma il risultât di 1-3 al è stât bausâr. La scuadre di Sottil, ancjemò cence 4-5 titulârs e in formazion di emergjence, e varès meretât di plui, almancul la pate, cuntune scuadre che za il dì S. Stiefin e tornarà in cjamp. Sabide che e ven, a Udin e rivarà ancjemò une formazion di nivel european: l’Athletic Bilbao. (A.I.) – 12.12.2022