Mara Navarria si conte ai students a Glemone

La schermidore furlane Mara Navarria, aur olimpic inte spade a scuadris tai Zûcs olimpics di Parîs dal 2024, e sarà ospitade de Universitât dal Friûl a Glemone miercus ai 2, aes 6.30 dopomisdì inte aule 1 de Cjase dal student. L’incuintri al è viert a dute la citadinance e indreçât ancje ai students. Cu la campionesse e sarà ancje il so preparadôr fisic (e ancje il so om) Andrea Lo Coco, laureât in Sience dal sport tal Ateneu furlan. Mara, invezit, e je laureade in Sience e tecniche dal sport e e à un master in Marketing sportîf. L’incuintri al sarà introdot dai coordenadôrs dai doi cors di lauree di Glemone, Maria Parpinel e Stefano Lazzer, e moderât dal gjornalist Francesco Tonizzo. (A.I.) – 01.04.2025