Paralimpiadis: ve la ‘scuadre’ furlane

E tache miercus ai 28 di Avost la edizion numar 17 de “Paralimpiade”. Dôs setemanis daspò de fin de trentesime tierce Olimpiade de ere moderne, Parîs e la France a tornin a vierzi lis puartis pal sport paralimpic che, mai cussì tant come chest an, al ponte a meti dongje numars di record. Obietîf che al à ben clâr pe Italie, che si presente in rive ae Sene cu la definizion di centrâ il risultât miôr de proprie storie. Ai Zûcs 2024 di Parîs, la Italie e sarà in gare in 17 dissiplinis, dôs in plui a pet di “Tokyo 2020”, cun 141 atletis in gare: 26 plui de ultime edizion, e plui di simpri. I atletis dal Friûl-Vignesie Julie a son sîs, siet cun Antonio Fantin, che al è a stâ a Bibion ma al è nassût a Tisane e si alene a Lignan. Chei altris a son Katia Aere di Spilimberc, medaie di bronç a Tokyo inte handbike; Giada Rossi di Çopule, za dôs medaiis di bronç intal tenis di taule; Davide Francescutti di S. Vît dal Tiliment, campion european di tîr a segn; Federico Mestroni di Rodean, un dai pilastris de scuadre di paraciclisim. Di Triest a vegnin Marko Frank (canotaç) e il zovin fenomen Matteo Parenzan, numar un dal tenis di taule. (A.I.) – 27.08.2024