Passe 400 fantats pal torneu di minirugby

Il torneu di minirugby “Citât di Udin”, rivât ae trentesime prime edizion, al è un dai avigniments sportîfs par zovins plui grancj de regjon, dulà che a àn partecipât simpri lis societâts plui impuartantis dal rugby talian e ancje cualchi scuadre dal forest. La decime seconde edizion dal memoriâl al vûl memoreâ Leonardo “Leo” Franz, nassût intal 1998, e Riccardo “Ricky” Rinaldi (1994), doi zovins atletis muarts masse adore, ma che a àn lassât il segn intal cûr dal grant mont de bale ovâl. A contindisi il trofeu cetant bramât, domenie ai 30 di Març a laran jù in cjamp une cincuantine di scuadris sot dai 6, 8, 10 e 12 agns: passe 400 fantaçuts dai 5 ai 11 agns cui lôr alenadôrs, che a daran vite a partidis apassionantis, ancje par fâ cognossi un sport fat di grancj valôrs. (A.I.) – 26.03.2025