Provedel, il portîr miôr di une ponte

Cuant che al jere fantaçut, prime al Treviso e dopo al Pordenon, al faseve la ponte. Vuê che al è alt un metri e 94 cm, al è portîr, un dai plui fuarts de serie A. L’an passât al à fat il record: passe 600 minûts di file cence cjapâ gol e in dut 21 partidis. Martars di sere, Ivan Provedel di Pordenon al à fat di plui: ae prime partide di Cope dai Campions, al cuart minût di recupar, si è butât in aree a dîs seconts de fin e al à segnât di cjâf, come une vere ponte, sul passaç perfet di Luis Alberto. Risultât: une pate che la sô scuadre, la Lazio, no si spietave plui, cuintri il fuart Atletico Madrid. Par Provedel, che intal 2010 al è stât ancje al Udin intes scuadris dai zovins, nol è il prin gol su azion: ‘ndi veve za fat un tal Fevrâr dal 2020, cuant che al zuiave cu la maiute de Juve Stabia. (A.I.) – 20.09.2023