Runjaic, il sorestant che ducj a volaressin

A mancjin dodis partidis ae fin dal campionât e l’Udin al à za cuasi i stes ponts di chel passât. Al mancje a pene che un par rivâ a 37, il risultât rivât l’an passât dome cu la vitorie intal finâl a Frosinone, che e à tignût la scuadre blancje e nere in serie A. Di chê volte al è cambiât cetant, cuasi dut. Soredut il tecnic, che al è za al principi dal campionât al jere rivât a meti in cjamp une scuadre diferente dal passât, e che intes ultimis setemanis e somee pronte par altris travuarts e no dome la salvece. Kosta Runjiac si è vuadagnât ducj i spazis pussibii tal fin de setemane dopo l’episodi dal rigôr che al à puartât la vitorie a Lecce. In struc: l’atacant Lucca lu à ‘robât’ al cjapitani Thauvin, che al veve di tirâlu, lu à segnât e po dopo al è stât clamât fûr dal cjamp dal alenadôr, che dut câs i à fat i compliments pal gol, ma al à visât ducj che lis regulis di une scuadre, di un grup, a vegnin prime di dut. E soredut lu à fat cence rumôr, cence scjas, sierant la puarte par ogni gjenar di polemiche e dimostrantsi no dome che un bon alenadôr intivât, ma ancje une grande persone e il ‘sorestant’ che ducj forsit a volaressin vê. (A.I.) – 24.02.2025