Seconde partide pal Udin, cheste volte a Clanfurt

Inte tierce dì dal ritîr in Carinzie, l’Udin al fronte la seconde prove stagjonâl, in program vuê aes 6 dopomisdì al Sportzentrum Fisch di Clanfurt. L’aversari al è la scuadre locâl de Ask, che e zuie intal campionât austriac di Tierce categorie. A mancjaran ancjemò i nazionâi Lovric, Samardzic, Bijol, Abankwah e Pafundi, di là dai infortunâts Deulofeu, Ebosse, Ehizibue e Success. Sottil, che al domandarà soredut di fâ i compits assegnâts cu la massime diligjence, al podarès fâ zirâ i oms par impleâ ducj, messedant titulârs e risiervis intes dôs formazions che al mandarà in cjamp. (A.I.) – 19.07.2023