Setante agns indaûr, un furlan sul K2

Ai 31 di Lui dal 1954, une spedizion sientifiche alpinistiche taliane e leve su’, pe prime volte, su la cime dal Karakoram 2, miôr cognossût cul non di K2: la seconde cime plui alte tal mont, inte cjadene de Himalaia. Ideadôr de imprese al jere un furlan: il sienziât Ardito Desio, nassût a Palme, vivût fint a 104 agns, muart ai 12 di Dicembar dal 2001 a Rome, tra i paris de gjeologjie in Italie, uficiâl dai Alpins inte Prime vuere mondiâl, esploradôr in Afriche, cjâf spedizion in cetantis impresis dal Afghanistan al Karakorum, fint ae scuvierte dal petroli in Libie. Inte sô scuadre a jerin ancje l’alpinist cjargnel Cirillo Floreanini di Denemonç e il gjeofisic Antonio Marussi di Triest. Desio al jere stât za a provâ di lâ sul Karakoram intal 1929 e il  so lustri, concuistât in cetantis spedizions sientifichis, al à convinçût i invistidôrs a finanziâ il gnûf ambiziôs progjet. La “concuiste” dal K2 e veve un valôr simbolic par dute la Italie, lade fûr cui vues rots de vuere e che e veve une grande voie di svindic internazionâl. Ancje se e je plui basse dal Everest, la cime dal K2 e je ancjemò vuê une di chês plui dificilis di frontâ. (A.I.) – 31.07.2024