Il grant balon european al torne a Udin: il Comitât de UEFA, che si è dât adun lunis ai 16, al à individuât il Bluenergy Stadium tant che sede de Supercope Europeane 2025, che ai 13 di Avost dal an che al ven e viodarà zuiâ lis vincidoris de cope de Champions League e de Europe League. Un dai trofeus plui prestigjôs dal balon european, che al vignarà contindût pe prime volte in Italie intune date storiche par Udin e pal so stadi. La sielte dal Bluenergy Stadium tant che sede de Supercope e je dome che l’ultin ricognossiment in ordin di timp dal nivel des struturis dal implant blanc e neri e de innomine che al gjolt par lis istituzions dal balon talianis e europeanis. Daspò de ristruturazion, di fat, il Bluenergy Stadium al à ospitât in cuatri ocasions la Nazionâl taliane – la ultime intal Otubar di chest an – di là di jessi stât la sede de finâl dal campionât european Under 21 dal 2019. A favorî la sielte dal implant blanc e neri de bande de UEFA ancje i diviers progjets di sostignibilitât inviâts de societât Udinese Calcio, tant che il parc solâr che al vignarà screât in curt al Bluenergy Stadium, che a van inte direzion tacade de UEFA cul obietîf di passâ a une economie circolâr dentri dal balon european. Al è l’avigniment sportîf plui impuartant mai ospitât tal Bluenergy Stadium e in gjenerâl in Regjon: une partide che e puartarà dôs tra lis miôr scuadris di Europe intal stadi dai blancs e neris e al pontarà i rifletôrs di dut il mont su Udin e sul Friûl- Vignesie Julie. (A.I.) – 16.12.2024
22
