La ASU – Associazion sportive di Udin e ripropon, sabide ai 28 e domenie ai 29 di Setembar, il Torneu internazionâl di gjinastiche, cetant spietade di atletis e tecnichis che si preparin a frontâ la gnove stagjon agonistiche, e che cussì a screin la agjende plene di impegns. Un avigniment che al torne a fâ deventâ il Friûl-Vignesie Julie, e in mût particolâr la citât di Udin, il pont di riferiment tecnic pe gjinastiche ritmiche internazionâl. Il PalaPrexta di vie Lodi al darà acet plui o mancul a 200 gjinastis, dai 8 ai 18 agns, che a vegnin di Australie, Austrie, Bosgne Erzegovine, Cravuazie, France, Gjermanie, Gran Bretagne, Lussemburc, Portugal, Republiche Ceche, Slovachie, Stâts Unîts, Kazakistan e Italie. Pe Asu a saran presintis Tara Dragaš, medaie di arint al Campionât European 2024, e lis nazionâls Isabella Tavano e Isabel Rocco. (A.I.) – 27.09.2024
Foto di F. Carabelli
