A saran i spadiscj e lis floretistis a dâ la vie vinars ai 6 di Zenâr ae diesime setime edizion de Cope dal Mont Under 20 ospitade in Friûl Vignesie Julie. Su lis 32 pedanis preparadis pe prime volte al Cuartîr Fieristic Udinês (intai paveons 5 e 7) si sfidaran i miôr zovins talents de scherme mondiâl. L’avigniment, secont par impuartance dome ai Campionâts dal Mont, al larà indevant sabide cu lis cuatri garis a scuadre di floret e spade, masculinis e femininis, e si concludarà domenie cul floret masculin e la spade feminine individuâi.
A screâ l’avigniment a pensaran i 252 spadiscj che a laran sù in pedane aes 9 de matine. Aes 11 al scomençarà la gare des 168 floretistis. Ancje in cheste competizion lis talianis a son tra lis favoridis.
A saran plui di 800 i atletis impegnâts inte trê dîs di garis; 58 Paîs i Paîs rapresentâts: dute la Europe, ma ancje atletis di Asie, Afriche, Sudameriche e Oceanie. (A.D.G.) – 5.01.2023
