Udin al prin puest, ma dome par pocjis oris

Tant che tai agns di Zaccheroni o di Guidolin, o forsit ancje miôr! Dopo la cuinte vitorie une daûr di chê altre, l’Udin al è tierç in classifiche, daûr dome a Napoli e Atalanta. Ma par pocjis oris – de partide a ore di gustâ cul Inter aes dôs partidis posticipadis – al è stât di bessôl al prin puest. La ultime volte e jere stade, par pardabon, plui di 20 agns indaûr, intal 2000-2001! Dopo vê batût Monza, Fiorentina, Roma e Sassuolo, la formazion alenade di Sottil è à vinçût ancje cul Inter, che al jere lât in vantaç dopo 5′ . Une miôr cundizion atletiche, une impostazion mentâl e fisiche cuasi perfete e lis sieltis tatichis dal alenadôr a àn fat deventâ in chest moment la scuadre blancje e nere no dome la rivelazion dal campionât, ma chê che e zuie miôr di dutis lis altris. Dopo la polse di domenie prossime pai impegns des nazionâls, il derby a Verone cul Hellas. (A.I.) – 19.09.2022