Udin e piert il derby a Triest tal ultin secont

Une partide striade, cuasi un brut sium, pai 600 spetatôrs furlans che domenie di sere a son lâts a Triest pal prin derby di bale tal zei dopo tancj agns, in A2. La scuadre di cjase, tornade jù dopo tancj agns in A1, e à vinçût propit al ultin secont, cuntun tîr di trê ponts di Eli Brooks che al è jentrât intal zei un moment prime che e sunàs la sirene, sierant la gare sul 57-54 par Triest. Un ton intal palaç dal sport pai cinc mil tifôs triestins, che a àn esultât – e no dome chel – ae fin di une partide no biele, cuntun risultât compagn di chei des categoriis zovinis di bale tal zei. La Old Wild West Udin, alenade di Vertemati, in vantaç par cuasi dute la partide, e à falât propit inte sô “specialitât”, il tîr di 3 ponts, straçant ae fin la pussibilitât di passâ i triestins, ancje cuntun piçul jutori dal arbitri! (A.I.) – 06.11.2023