Udin: gnove maiute, vecjos presits pai abonâts

Presentade la gnove campagne abonaments dal Udin, che e tache joibe ai 18. “Blancs e neris braurôs” al è il sproc di chest an, daspò di un campionât avonde dificil e la salvece che e je rivade dome te ultime zornade. La societât e à capît il moment e cussì e à lassât i presits compagns di chei dal an passât. La novitât e je la introduzion de “membership Udinese 1896”, une tessare speciâl che e darà vantaçs a ducj chei che a amin i colôrs blancs e neris, par cjapâ dentri simpri di plui i tifôs inte vite de societât. La fase dedicade ai abonâts dal ‘23/’24 e durarà fint ai 31 di Lui: dai 3 di Avost la vendite libare par ducj. Presentade ancje la gnove maiute, che e torne a vê lis tradizionâls bandis verticâls blancjis e neris, compagn de stagjon 1995/96, la prime des trente une daur di chê altre inte massime serie: e propit daûr dal dacuel e je la scrite dorade “30 E LAUDE”, une dediche a dut l’ambient blanc e neri, ancjemò une volte decisîf par rivâ a chest travuart. (A.I.) – 17.07.2024