Une piçule Formule 1 eletriche pe Universitât dal Friûl

La gnove monopuest eletriche ideade e costruide dai students de Universitât dal Friûl e vignarà presentade martars ai 25, aes 4 dopomisdì, tal plaçâl devant la Biblioteche sientifiche (in vie Fausto Schiavi 44).  Dopo la introduzion dal responsabil dal progjet “Uniud E-Racing” Luca Casarsa, a son previodûts i salûts dal diretôr dal Dipartiment politecnic di Inzegnarie e Architeture, Alessandro Gasparetto, e dal retôr Roberto Pinton. La veture e fasarà garis intal campionât internazionâl “Formula Student”. La competizion e je risiervade aes monopuescj a propulsion eletriche o tradizionâl, studiadis e fatis dai students universitaris di dute Europe. Il progjet di cheste piçule Formule 1 eletriche dal Ateneu furlan al è nassût intal 2021 e l’an passât al à viodût il so debut uficiâl. (A.I.) – 24.06.2024