Zîr de Italie: dôs tapis in regjon

La edizion numar cent e vot dal Zîr de Italie, une des competizions ciclistichis plui prestigjosis tal mont, e passarà ancje chest an te nestre regjon, par ben dôs voltis. Presentade a Rome a cuasi cuatri mês dal inizi, la “corse colôr di rose” no larà su lis monts furlanis, tant che al è sucedût dispès intai ultins agns. Dut câs, la decime cuarte tape, ai 24 di Mai, e puartarà i cicliscj di Trevîs a Nova Gorica-Gurize cuntun percors di 186 chilometris inte planure venite e inte Basse furlane, prime di tocjâ Cormons e lis culinis dal Cuei talian e dal Brda sloven. Par sierâ, doi zîrs dal circuit di 13,8 chilometris che al coleghe Nova Gorica e Gurize, intal an de Capitâl europeane de culture. Doi dîs dopo, i atletis si movaran a Vile di Flum pe partence de tape di mont: un percors di 214 km che al tocjarà Pordenon, Purcie e Fontanefrede par dopo transitâ viers S. Martin Cuel Umbert, in omaç a Bottecchia intal an dal centenari dal so secont Tour vinçût intal 1925. Daspò di jessi rivâts sù su la Mont Grappa, si tornarà jù in direzion dal travuart a Asià. (A.I.) – 14.01.2025