A tornin ancje in Friûl-Vignesie Julie lis Zornadis Fai di Sierade, rivadis ae decime seconde edizion. Sabide ai 14 e domenie ai 15 di Otubar la Delegazion di Udin e vierzarà lûcs insolits, dulà che storie e tradizion si lein a art e culture. Une fin di setemane par scuvierzi il teritori de Provincie di Udin: a vignaran vierts sîs lûcs in cuatri Comuns che a son pôc lontans dal centri citât: Morùs, Manzan, Paulêt e Rude. La Delegazion Fai di Udin si môf par fâ cognossi ai visitadôrs piçui cjantons de nestre regjon che dispès a restin platâts, ma che a meretin un puest di dut rilêf tra lis bielecis dal nestri Paîs.
Ve duncje la sielte di rivâ intal Comun di Morùs, cu la viertidure di trê lûcs, che un al jere metût al secont puest a nivel regjonâl inte classifiche di “i Lûcs dal Cûr”. Si trate dal Borc di Sante Margarite dal Gruagn, di Sant Andree cu la sô gleseute, il vignâl e la aziende agricule e dal Fuart di Sante Margarite. Une triade colegade di un percors pedonâl che al lassarà maraveâts i partecipants. La Glesie di Sante Margarite, la visite al borc e a un zardin privât, po il borc di Sant Andree, par rivâ al Fuart.
Intal Comun di Manzan, si vierzaran di gnûf lis puartis de Acetaia Midolini, delizie par voi, nâs e bocje, dulà che al sarà pussibil scuvierzi lis origjins dal edifici, de tradizion e de inovazion leâts ae produzion dal balsamic ancjemò vuê espuartât in dut il mont.
A Paulêt al sarà pussibil visitâ l’Antiquarium della Motta cu la sô mostre dai fossii. Un museu sugjestîf dedicât ae scuvierte dai fossii e ae storie leade ai sgjâfs archeologjics al rivarà a fâ imerzi grancj e picinins intune visite ae scuvierte di cemût che o sin rivâts a vuê, ripassant traviers i rescj il nestri îr. Infin, la viertidure de Amidarie Chiozza (Lûc dal Cûr 2016) di Rude, che tal 1800 al nas sui rescj di un vecjo mulin. Un lûc particolâr e sugjestîf indulà che al sarà pussibil scuvierzi i metodis particolârs di lavorazion che intal cors dai secui lu àn fat deventâ fulcri de storie industriâl.
Sul puest, dongje i bancuts ae jentrade di ogni ben, pussibilitât di rinovament de tessare e di notâsi intal Fai pe prime volte cul scont di 10 euros su dutis lis cuotis. (a.d.g.) – 10.10.23
