Divertiment, condivision e solidarietât: a son chescj i pilastris de “Corsa delle rose” di Lignan, manifestazion podistiche no competitive dedicade al mont feminin, ma vierte a ducj, che chest an si tignarà domenie ai 16 di Avrîl. La iniziative e previôt doi percors, di 5 e di 9 chilometris, di frontâ corint o cjaminant pes stradis de destinazion balneâr plui grande dal Friûl-Vignesie Julie, amirant dulinvie il percors i ponts plui carateristics: par esempli, la architeture iconiche a cape de Terace a Mâr, la rive Kechler cui mosaics carateristics che a decorin i implants balneârs e la rive Triest, che e puarte bande la ponte de penisule lignanese. Ma la “Corsa delle Rose” e je prime di dut une ocasion solidarie impuartante a poie des ativitâts di prevenzion de LILT (Lega Italiana Lotta contro i Tumori) di Udin, che i sarà destinât part dal rigjâf de zornade. (A.D.G.) -03.04.2023
(Foto: Dag Communication)
