Dal mâr ae scuvierte di Gurize capitâl de culture

La pluralitât de storie e de culture di Gurize e dal teritori transfrontalîr e je al centri dal progjet turistic culturâl “Crocevie d’Europa”, un percors inedit di scuvierte de citât e dai siei contors. Dopo lis tantis escursions di chescj mês, la iniziative e rive a Lignan e a Grau cuntune ufierte “Hop on Hop off” in plui lenghis (talian, todesc e inglês), dedicade in maniere specifiche ai turiscj che di Istât a stan tes dôs localitâts turistichis e ai lôr abitants. Dôs lis escursions risiervadis a Grau, joibe ai 4 e joibe ai 18 di Lui, e une a Lignan ai 17 di Lui, dutis a partecipazion gratuite daûr prenotazion. L’itinerari di Lignan e Grau a Gurize e Nova Gorica cu la coriere al previôt une zornade tal segn de culture e de storie, ae scuvierte des dôs citâts che a saran Capitâl Europeane de culture 2025. (A.I.) – 03.07.2024