Dimoris privadis viertis, e i parons a fasin di vuide

A son 21 lis dimoris privadis, ancjemò abitadis, che a vierzin lis puartis di joibe ai 25 a domenie ai 28 di Avrîl pe seconde edizion dal Festival des dimoris storichis inmaneât de Adsi. E a saran propit i parons a fâ di vuide, par contâ no dome la storie e la architeture dal puest, ma ancje fats e curiositâts dai lûcs che si passin di gjenerazions. E sarà la ocasion juste par cognossi e fâ cognossi un patrimoni straordenari, unic in Europe, par storie, valôr culturâl e artistic. Sedis i puescj te ex provincie di Udin, di Comelians a Feagne, di Braçâ di Murùs a Cjassà, di Marsuris di Paulêt a Clauian, Trivignan, Pavie, Rude, Strassolt, Cjamplunc, Aquilee e ben si intint la capitâl, là che a vierzin Vile Garzoni, Palaç Orgnani e Pavona Asquin. Lis altris viertiduris a Lucinîs, Romans dal Lusinç, Manià e Polcenic, cuntun program di passe 40 events: cercis, cenis, presentazions di libris, mostris di art, concierts, conferencis, teatri… (A.I.) – 24.04.2024