Dutis lis fiestis pe gnot dai Sants

La gnot dai muarts (o dai sants), ven a stâi ai 31 di Otubar, no je dome che un inovâl religjôs, ma e je deventade ancje chi di nô une fieste ‘laiche’ che e va daûr di cualchi ispirazion che e rive drete de Americhe. Ma che pardabon e je stade tirade fûr di une tradizion antighe che e rive fint ai celtis. Si che duncje, un pôc par tradizion, un pôc par lâ daûr ae fieste ‘impuartade’ di Halloween – cui siei muarts, spirts, vues e mostris… par fente –, di ogni bande in Friûl a son fiestis tai borcs par lâ indaûr in timps lontans o di fantasie. A Dimpeç, par esempli, il spetacul lu fasin lis cocis, intun cui gaugars; a Sacîl si fâs fieste par piçui e grancj adun; a Morâr dongje Caprive e je inmaneade une grande sfilade prime de fieste. A Paluce e a Sudri si fâs une cjaminade tal bosc e a Forgjarie, te risierve naturâl di Curnin, la gnot dai muarts e devente pardabon di fâ pôre cul jutori des bestiis dal lûc. Par cui che al vûl, si pues ancje passâ la gnotolade dentri di un museu: tal “Gortani” di Tumieç o tal Etnografic di Udin. La fieste plui grande e je chê programade tal cjistiel di Susans, parsore Maian. L’event, cul non par inglês “Halloween in the Castle”, al tache di dopomisdì pai fruts e, di sere, al varà al centri un grup di balarins, musiciscj e cjantants, i Supalova, cuntun dai plui innomenâts Dj a nivel internazionâl, Joe T. Vannelli. (A.I.) – 29.10.2024