Sîs variûi, dopo analisis, inanelament e controi sanitaris, a son stâts rimetûts in libertât inte Risierve naturâl regjonâl dal lât di Curnin.
Cualchi rapaç une vore “afezionât” al someave no volê propit savê di petâ il svol. Cualchi altri, invezit, si è slontanât daurman vierzint lis alis poderosis.
La liberazion e je sucedude dilunc dal apontament anuâl tradizionâl “Vîfs e libars di svolâ”, che chest an al à regjistrât ancje la consegne di une ventine di altris esemplârs tra falcuçs di cjampanili, civuitis, cagnis, tortorelis e colombats, salvâts e curâts dai Centris pal recupar animâi salvadis di Udin e di Pordenon.
Il numar dai variûi presints intal sît protet al continue a cressi an par an. E l’areâl di nidificazion si è ampliât ancjemò di plui, soredut in direzion Cjargne e Prealps Cjargnelis. (a.d.g.) – 02.10.23
